Transformación Urbana en Cidades Españolas: Da Cidade Difusa ao Centro Histórico

Evolución das Cidades Españolas: Estrutura e Transformación

As cidades españolas posúen elementos de épocas distintas: o centro histórico; os ensanches; os arrabaldes; os desenvolvementos urbanos densos; e as novas periferias, cada vez máis fragmentadas. As cidades transfórmanse: medrando cara ao exterior coa creación de novos espazos residenciais e por procesos de reestruturación no seu interior. Aparecen centros comerciais, parques empresariais... Prodúcese un proceso de fragmentación do espazo urbano con pezas conectadas entre si por autovías e estradas.

a) Cidade Difusa

O modelo de cidade mediterránea foise substituíndo polo tipo de cidade difusa de modelo anglosaxón. A cidade difusa esténdese horizontalmente e está separada en áreas especializadas e monofuncionais: zonas residenciais, áreas comerciais, zonas de lecer... Ademais diminúe o contacto humano, os intercambios e a sociabilidade. É unha tipoloxía urbana caracterizada pola mestura de usos e de funcións e pola tendencia a ocupar un territorio moi extenso. A aceleración na ocupación do espazo implicou maior mobilidade individual.

b) Os Cambios no Centro Urbano (Degradación vs. Rehabilitación)

A partir da segunda metade do século XX, os centros históricos de moitas cidades españolas comezaron a sufrir un deterioro e abandono. A maior parte da poboación eran anciáns con baixos niveis de renda, polo que o centro tivo un proceso de avellentamento e empobrecemento. Todo isto reflectiuse nunha deterioración urbana, xa que moitas vivendas quedaron baleiras. Ao mesmo tempo, a actividade económica desprazouse cara aos ensanches. O centro histórico retén algúns centros administrativos e eclesiásticos instalados en edificios monumentais, como os comercios tradicionais.

Ao longo das últimas décadas, as tendencias anteriores víronse compensadas por procesos de revitalización destas zonas debido a:

• Políticas públicas de conservación e revitalización: As administracións públicas investiron na rehabilitación dos edificios e a mellora dos espazos públicos.
• Desenvolvemento do turismo cultural: Que potenciou a rehabilitación dos centros históricos españois, mediante a restauración de edificios e a peonalización de rúas e prazas.
• Cambio de actitude da poboación local: Os centros dalgunhas cidades están atraendo poboación nova e de maior nivel de renda, o que contribúe a conservar os edificios residenciais.

c) Cambios no Uso do Solo Urbano

Os usos do solo son as diferentes utilizacións do espazo urbano: comercial e de negocios, residencial, etc.