Os Principais Sectores Industriais e o Papel do Ferrocarril

COMP. 11: Os Principais Sectores Industriais e o Papel do Ferrocarril

En Inglaterra, desde mediados do século XVIII, producíronse un conxunto de transformacións que se coñecen como revolución industrial. Esta estendeuse por toda Europa con diferente ritmo, producindo crecemento económico.

A industrialización en España iniciouse a partir da década de 1830, pero o seu desenvolvemento estivo marcado por numerosas limitacións e peculiaridades, como:

• Escasas transformacións nos sistemas agrarios (mantemento dunha agricultura tradicional que empregaba grandes cantidades de man de obra con baixa produtividade).
• Reducida capacidade de consumo do mercado interior.
• Lentitude nos cambios lexislativos de carácter económico.
• Despreocupación pola educación e innovacións tecnolóxicas.
• Escasa mentalidade emprendedora e capitalista.
• Preferencia por investimentos inmobiliarios ou especulativos.
• Predominio de actividades industriais relacionadas co sector primario e de bens de consumo.
• Protección arancelaria e forte desequilibrio territorial e rexional.

O desenvolvemento industrial en España presenta fortes desequilibrios rexionais. Fronte a unhas zonas industrializadas, outras permaneceron atrasadas e rurais.

Cataluña constituíu a principal zona industrial de España. O desenvolvemento estivo fortemente ligado ao sector textil, constantemente renovado coa introdución do algodón, a mecanización das tarefas, o reinvestimento dos capitais obtidos e o espírito de empresa. Foi a partir da década de 1830 cando se introduciron as máquinas de vapor para mover os teares (as primeiras foron as da fábrica Bonaplata de Barcelona). A partir da década de 1870, para aproveitar a enerxía hidráulica, creáronse novas industrias textiles nas concas dos ríos.

A producción téxtil catalá estivo destinada fundamentalmente ao mercado interior e ás colonias de Cuba e Filipinas, sendo favorecida nos períodos de proteccionismo e perxudicada nos períodos de librecambismo. O desenvolvemento téxtil propiciou a diversidade industrial de Cataluña co crecemento doutros sectores.