Glosario de Termos Xeográficos e Económicos

Curva de nivel

Isopleta ou liña que une puntos de igual altitude sobre o nivel do mar.

Cultivo forraxeiro

Tipo de aproveitamento agrícola cuxo destino é a alimentación do gando.

Estuario

Extensión mariña nas proximidades da desembocadura dun río onde se producen interaccións entre a auga doce e salgada por efecto das mareas, que xeran un ecosistema peculiar.

Acuífero

Unidade litolóxica que contén auga ou pola que flúe a auga subterránea.

Augas xurisdicionais

Espazo mariño sobre o que un estado exerce a súa soberanía e forma parte do seu territorio, polo que lle pertence a explotación dos seus recursos.

Saldo migratorio

Diferenza entre a emigración e a inmigración nun país.

Poboación inactiva

Aquela que non xera bens e servizos: rendeiros, amas de casa, nenos, xubilados, etc. A clasificación presenta algún problema dadas as características destes colectivos.

Materia prima

Elementos naturais utilizados para a súa transformación industrial en produtos acabados.

Importación

Conxunto de operacións comerciais que supoñen a entrada nun país de produtos elaborados no exterior, noutros países.

Condensación

Proceso atmosférico da formación de nubes e precipitacións, que consiste no paso da auga do estado de vapor ao estado líquido por un cambio de temperatura da masa de aire que xera a súa saturación de humidade.

Rambla

Río mediterráneo que circula sen auga no período de estiaxe, deixando o leito ao descuberto.

Biosfera

Esfera natural da vida, onde se inclúen os animais, a vexetación e os solos, e que está en interacción coa atmosfera, a litosfera e a hidrosfera.

Transgresión mariña

Avance do nivel do mar sobre o continente debido a diversas circunstancias (movementos isostáticos, eustáticos, fusión de xeos e quecemento global do clima, etc.).

Taxa de actividade

Taxa que relaciona a poboación activa (ocupada e desocupada) coa poboación total dun país en tantos por cento.

Cidade dormitorio

Cidade-satélite próxima a unha metrópole, coa que está estreitamente vinculada e cuxa función esencial é a residencial.

Chuvia ácida

Precipitacións cargadas de elementos altamente contaminantes procedentes de lugares máis ou menos afastados debido aos movementos das masas de aire, á dinámica atmosférica e ás propias características do ciclo hidrolóxico.

Movemento pendular

Movemento migratorio de curta distancia, repetitivo, que non supón cambio de actividade e que se produce da periferia ao centro urbano e viceversa nos días laborables, debido á concentración de empregos no centro da cidade e á tendencia ao crecemento en extensión do espazo residencial pola área metropolitana.

Fonte de enerxía

Recurso natural que é susceptible de transformarse en xerador de enerxía, en forza motriz para o desenvolvemento dun traballo, mediante o seu almacenamento e distribución.

Polígono industrial

Espazo reservado e acondicionado para acoller actividades industriais nas proximidades dunha aglomeración urbana, con boas infraestruturas e fácil comunicación a través dos medios de transporte.

Exportación

Venda de bens e produtos dun país ao exterior das súas fronteiras.

Morea

Material que un glaciar arrinca, transporta e deposita.

Crecemento real

Resultado de aplicar o saldo migratorio (emigración e inmigración) ao crecemento vexetativo ou natural (taxa de natalidade menos taxa de mortalidade) nunha sociedade.