Autocracia
Forma de goberno onde o poder recae nunha soa persoa. As monarquías absolutas e as ditaduras son tipos de autocracias. Dentro deste tema, por autocracia estamos a referirnos ao sistema político no que se atopaba a Rusia tsarista, coa dinastía dos Romanov desde o século XVII. Os seus pilares foron a burocracia, unha policía todopoderosa e a Igrexa Ortodoxa.
Colonias
Territorios que dependían política, administrativa e economicamente dunha metrópole. Adoitan estar situadas en climas cálidos, pouco propicios para o ser humano europeo, e servían á metrópole como mercado reservado, aínda que tamén atopamos colonias que responden a criterios estratéxicos (Xibraltar, Singapur ou Malta). Distínguense as colonias de poboamento e de explotación.
Concesión
Asentamento de poboación estranxeira para a realización de negocios. Este fenómeno deuse no contexto do imperialismo e tivo como característica principal a desigualdade entre as partes contratantes do acordo. Exemplo diso é Hong Kong (China).
Conferencia de Berlín
Reunión das principais potencias imperialistas europeas organizada polo chanceler alemán Otto von Bismarck entre 1884 e 1885. Tiña como obxectivo evitar tensións na repartición de África. Acordouse a cuestión do imperio colonial continuo e o problema dos dereitos de ocupación, entre outras cuestións.
Democracia
Réxime político no que todos os cidadáns poden desempeñar cargos públicos, así como participar na elección de quen os ostenta. A loita pola democracia, entendida como a dimensión política e social da igualdade de dereitos, conseguiu lentos e substanciais avances desde finais do século XIX nalgúns países europeos e nos Estados Unidos.
Mandatos
Cesión temporal dun territorio a unha metrópole contando co respaldo dunha autoridade internacional (Sociedade de Nacións). Deuse fundamentalmente tras a Primeira Guerra Mundial e afectou ás colonias das potencias derrotadas, por exemplo Siria e Palestina.
Metrópole
País que administra territorios situados fóra das súas fronteiras (colonias). Trátase dun concepto de longa tradición que remite á Grecia clásica (de
"meter" - nai e
"polis" - cidade).
Monarquía Constitucional
Forma de goberno onde o rei ten un amplo abano de competencias, intervindo significativamente no desenvolvemento da vida política: comparte a soberanía co Parlamento, participa na elaboración das leis e exerce en exclusiva o poder executivo e a dirección política nomeando e cesando libremente ao seu Goberno.
Protectorado
Tipo de administración colonial que, durante a etapa do imperialismo, permitía á metrópole controlar a economía e a política exterior dun territorio á vez que respectaba o seu goberno e asuntos internos. Exemplo de protectorados son Nixeria ou Kuwait.
Sistemas Bismarckianos
Reciben este nome as alianzas lideradas polo chanceler Otto von Bismarck con outros países europeos, especialmente con Austria-Hungría, Rusia e Italia, co fin de evitar conflitos armados entre elas, así como illar a Francia.
