Conceptos básicos de xeografía física e medio ambiente

Aridez

É a falta de auga e humidade no solo ou no aire en contacto coa terra. Pode ser provocada pola situación constante dun anticiclón nunha determinada zona ou por atoparse nunha zona resgardada (montañas) da chegada de masas de aire cargadas de humidade.

Avaliación de impacto ambiental

Procedemento técnico-administrativo que serve para identificar, prever e interpretar os impactos ambientais que producirá un proxecto no seu contorno en caso de ser executado, co fin de que a administración competente poida aceptar, rexeitar ou modificar ese proxecto.

Cunca fluvial

Aquela rexión que verte augas sobre un mesmo cauce fluvial.

Esteiro

Extensión mariña próxima á desembocadura dun río, de amplas dimensións, onde se produce a interacción do mar e do río.

Estiaxe

Nivel máis baixo que as augas dun río teñen ao longo dun ano. Tamén é a época na que se produce ese nivel mínimo.

Foz

Corte profundo ou val transversal e estreito feito por un río, predominante en zonas de rocha caliza.

Landa

Formacións vexetais nas que destaca a familia das ericáceas (carqueixa) e das leguminosas (xesta e toxo) e que se localiza sobre solos húmidos e non traballados. Débese á tala de masas arbóreas.

Laurisilva

Paisaxe vexetal, tamén chamada de selva temperada ou bosque laurifolio. Trátase dun tipo de bosque nuboso subtropical ou selva alta, propio de lugares húmidos, cálidos, e con leves xeadas ou sen elas, con grandes árbores e lianas cuxas follas se parecen ás do loureiro, do que toma o nome. En España é propia das Illas Canarias.

Maquis

Matorreira baixa de arbustos e matas aromáticas propios do clima mediterráneo e que medra sobre solos silíceos. É froito da degradación por tala de antigos aciñais.

Marisma

Terreo lixeiramente deprimido con respecto ao nivel do mar que resulta asolagado pola subida da marea.

Paisaxe

Calquera área da superficie terrestre produto da interacción dos diferentes factores presentes nela (bióticos, abióticos e antrópicos) e que teñen un reflexo visual no espazo.

Ría

Val fluvial asolagado en parte ou na súa maior parte polas augas do mar.

Vexetación antrópica

Paisaxe ou zona na que a vexetación foi introducida ou modificada pola acción humana.

Vexetación clímax

Fase final da evolución dunha comunidade vexetal na que esta adquire un equilibrio co seu contorno medioambiental.