Ciclo da Materia e os Ciclos Bioxeoquímicos

Ciclo da Materia

A circulación da materia nos ecosistemas iníciase cando os produtores realizan a fotosíntese e incorporan ao seu organismo nutrientes do solo e do aire. Cando os produtores son comidos polos consumidores primarios, esta materia pasa ao corpo do herbívoro. Cando estes sexan devorados polos consumidores secundarios, a materia quedará incorporada ao corpo destes.

En cada piso os organismos que non son consumidos serán descompostos cando morren. Este proceso é levado a cabo polos descompoñedores, unha vez que a materia que circula pola pirámide de abaixo cara a arriba regrese ao solo e ao aire. A utilización da materia é cíclica. O percorrido que segue un elemento químico na natureza é o ciclo bioxeoquímico. Os seres vivos incorporan estes elementos químicos a través da alimentación.

Ciclo do Carbono

O carbono é un dos elementos máis abundantes nos compostos orgánicos.

1. O carbono é captado da atmosfera polos organismos autótrofos en forma de CO2, e pasa a formar parte da materia orgánica mediante a fotosíntese.
2. Os organismos autótrofos e os heterótrofos oxidan a materia orgánica para obter enerxía en procesos como a respiración e producen CO2 que se incorpora de novo á atmosfera.
3. Os organismos descompoñedores degradan á súa vez a materia orgánica dos organismos que morren e orixinan CO2, que tamén se incorpora á atmosfera.

Ciclo do Nitróxeno

O nitróxeno é imprescindible como compoñente de proteínas e de ácidos nucleicos.

1. As bacterias fixadoras do nitróxeno fixan o nitróxeno atmosférico en forma de nitratos que serán absorbidos polas plantas.
2. As substancias que excretan os seres vivos tamén experimentan transformacións químicas que fan que o nitróxeno pase ao solo en forma de nitratos.
3. O resto dos organismos que morren experimentan unhas transformacións químicas que posibilitan que o nitróxeno volva á atmosfera en forma de nitróxeno gas.

Ciclo do Fósforo

O fósforo é un compoñente dos ácidos nucleicos.

1. A través das súas raíces, as plantas captan o fósforo e os outros sales minerais disoltos na auga. Este elemento pasa ao resto dos seres vivos.
2. A descomposición dos organismos produce o retorno do fósforo ao solo ou aos sedimentos dos fondos oceánicos.