Tipos de responsabilidade xurídica: Civil, Penal e Administrativa

1. Clases de responsabilidade

Responsabilidade: sobre unha persoa recaerán as consecuencias pola realización dun feito ou pola omisión dunha conduta. É xurídica se vén imposta polo Dereito.

Ten a característica de que é: obrigatoria e coactiva.

A responsabilidade recae sobre unha persoa que pode ser física ou xurídica. Pode ser civil, penal, administrativa e disciplinaria.

Responsabilidade civil

É a obrigación dunha persoa de reparar os danos que causou. Está regulada no Código Civil nos artigos 1.101 e seguintes para a responsabilidade contractual e nos artigos 1.902 e seguintes para a extracontractual.

Na extracontractual, se a persoa xurídica obrigada a reparar o dano pertence á Administración Pública, fálase de responsabilidade patrimonial das Administracións Públicas, regulada nunha norma de Dereito administrativo.

Responsabilidade penal

É o castigo que impón un xuíz mediante sentenza pola comisión dun feito tipificado como delito ou falta. O Código Penal recolle a maioría das condutas ou omisións que constitúen delito ou falta e as correspondentes penas.

Art. 109 CP: a execución dun feito descrito pola lei como delito ou falta obriga a reparar, nos termos previstos nas leis, os danos e prexuízos causados por el. O prexudicado pode optar por esixir a responsabilidade civil ante a xurisdición civil.

Se se comete un delito ou falta, hai responsabilidade penal e impónsese un castigo. Ademais, se dese delito ou falta derivou algún dano, hai obrigación de indemnizalo, que non é responsabilidade penal, senón responsabilidade civil derivada dos delitos e faltas (regulada nos arts. 109 e ss. CP).

Responsabilidade administrativa

A Administración Pública exerce un control sobre actuacións que teñen interese público e, en virtude da potestade sancionadora, impón sancións aos que cometan condutas prohibidas (infracción administrativa).

A Lei 55/2007 do Cine prevé un réxime sancionador; o incumprimento polas salas de exhibición cinematográfica dun 25% do total de sesións con obras cinematográficas de Estados membros da Unión Europea constitúe unha infracción que, segundo o artigo 40, pode ser:

• Moi grave
• Grave
• Leve

Responsabilidade disciplinaria ou profesional

Os Colexios Profesionais teñen uns estatutos que tipifican unhas condutas como infraccións e establecen as sancións correspondentes.

A responsabilidade civil é compatible con calquera outra porque ten unha finalidade diferente, mentres que as demais teñen en común que impoñen un castigo, se ben por distintos suxeitos, polo que estas exclúense entre si.