Teoría do desenvolvemento moral de Lawrence Kohlberg
A capacidade moral é un trazo exclusivo do ser humano, pero non nacemos con ela no seu pleno desenvolvemento, senón coa disposición para aprendela.
O desenvolvemento moral segundo Lawrence Kohlberg
En 1955, o psicólogo Lawrence Kohlberg realizou unha investigación ética con xente nova e descubriu que o razoamento moral atravesa tres niveis de desenvolvemento ata alcanzar a plenitude:
1. Nivel preconvencional
A persoa xustifica as súas decisións morais non por respecto a unha norma, senón por temor a ser castigada por unha autoridade. Cando o suxeito moral vai evolucionando, comeza a seguir os seus propios intereses, polo que a norma coincide co seu propio beneficio.
2. Nivel convencional
A persoa xustifica as súas decisións pola aprobación das persoas próximas (familia, amizades, etc.). Conforme avanza moralmente, o suxeito séntese parte dunha sociedade e acata as súas normas, asumindo que este comportamento mantén a orde dentro do grupo.
3. Nivel posconvencional
É o grao máis alto de maduración moral, que non alcanzan moitas persoas. Nel antepóñense os principios morais aos intereses persoais e ás normas de grupo. A persoa dáse de conta de que as normas morais son relativas ao grupo, pero recoñece tamén a existencia de valores universais, como os dereitos humanos.
Os dilemas morais
A teoría de Kohlberg baséase nunha serie de dilemas morais que foron presentados aos participantes do estudo para medir o seu grao de aceptación das normas e os motivos das súas accións morais. O máis coñecido é o dilema de Heinz.
Outras perspectivas éticas
O universalismo
O universalismo defende a existencia de valores morais absolutos que serven como criterio para xulgar a diversidade de costumes e códigos de conduta. Foi defendido por diferentes correntes éticas.
O intelectualismo moral
O intelectualismo moral é a teoría ética defendida por Sócrates e Platón. Significa que non hai persoas malas, senón ignorantes, e que quen sabe e coñece o que é o ben xa non vai deixar de practicalo, pois vaise dar conta de que ese é o verdadeiro camiño cara á felicidade.
Como vimos, Platón postulou a existencia das ideas, un tipo de realidades que, coma os entes matemáticos, só poden ser captadas pola razón. Os valores morais e a idea de ben son desta clase: só poden ser apreendidos despois dunha educación axeitada.