Historia de España: Ditadura de Franco e Paso á Democracia

Franquismo e Democracia en España: Unha Análise Histórica

O franquismo iniciouse ao final da Guerra Civil española, xa que o xeneral Francisco Franco estableceu unha ditadura ata a súa morte en 1975.

Características do Franquismo

• A concentración de poder en Franco, que era xefe do Estado, xefe do Goberno e Xeneralísimo dos Exércitos.
• A supresión da Constitución e, con ela, das liberdades e dos dereitos democráticos.
• A imposición do militarismo ou autoridade do exército.
• O nacionalcatolicismo foi o fundamento ideolóxico do réxime.
• O apoio político do réxime constituído pola Falanxe como partido único. Durante a ditadura pasou a chamarse Movemento Nacional.
• Os apoios sociais foron a oligarquía terratenente e financeira, e as clases medias rurais do Norte e de Castela.

Etapas do Franquismo

Primeiro Franquismo (1939-1957): Autarquía e Represión

Politicamente, esta etapa estivo marcada pola represión, por unha ideoloxía de orientación fascista e polo gran peso da Igrexa católica.

No terreo económico estableceuse a autarquía e reducíronse ao máximo as exportacións e as importacións.

Franquismo Pleno (1957-1973): Desenvolvemento Económico

É a época do asentamento político do réxime e do desenvolvemento económico. Caracterízase pola chegada dos tecnócratas ao equipo de goberno en 1957: técnicos que achegaron novos criterios á economía.

Crise do Franquismo (1973-1975): Etapa Final

A finais dos anos sesenta iníciase o declive do réxime pola crecente oposición interna e externa. A crise do petróleo de 1973 tamén afectou á situación económica. En 1975 púxose fin á ditadura e iniciouse o proceso de transición cara á democracia tras a morte de Franco e a proclamación de Xoán Carlos I como rei.

A Transición á Democracia (1975-1982)

É o proceso que permitiu pasar da ditadura franquista á democracia.

Tras a morte do xeneral Franco, Xoán Carlos I proclámase sucesor como xefe de Estado, quen nomea a Carlos Arias Navarro como presidente do Goberno. Logo, o rei forzou a dimisión de Arias Navarro e substituíno por Adolfo Suárez na presidencia do Goberno.

Adolfo Suárez sacou adiante a Lei para a Reforma Política (1976). Esta lei legalizaba os partidos políticos, convocaba eleccións democráticas e desmantelaba as estruturas político-xurídicas do réxime franquista. Suárez legalizou os partidos políticos e o dereito á folga.

O 15 de xuño de 1977 celebráronse as primeiras eleccións democráticas nas que gañou o partido UCD, presidido por Adolfo Suárez.