Economías de Escala, Pemes e Estratexias Empresariais

Economías de Escala

Enténdese por economías de escala a redución dos custos medios ou unitarios de produción que resultan dun incremento na produción a longo prazo. As causas principais da aparición de economías de escala son:

• Incremento da produción. Ante un aumento da produción, os custos fixos repártense entre un maior número de produtos, conseguindo así que o custo unitario sexa menor.
• A división do traballo polo incremento de produtividade que xorde da especialización.
• A estabilidade da demanda. Ao atender a unha maior cantidade de clientes a demanda vólvese máis predicible, o que permite reducir os custos de mantemento de almacéns.
• Poder de compra. Ao negociar maiores volumes de compra permítese conseguir unha diminución nos prezos.
• Aprendizaxe e especialización. A aprendizaxe e a experiencia que as empresas adquiren durante o proceso de produción aumentan a eficiencia e favorecen a redución de custos.

As Pemes en España

As pemes son empresas con menos de 250 traballadores que desempeñan un papel crucial no desenvolvemento económico de España. Pódese afirmar que constitúen o principal motor da economía do país. As pemes proporcionan tamén unha parte moi importante dos postos de traballo, o que explica a súa protección por parte dos poderes públicos.

Vantaxes das Pemes

• Proximidade ao cliente. Coñecen aos seus clientes e manteñen con eles unha relación directa e próxima, proporcionándolles un trato e un servizo personalizados.
• Flexibilidade e rapidez de reacción. Adáptanse con maior rapidez e axilidade que as grandes empresas aos cambios que se producen na contorna.
• Relacións humanas máis estreitas. O empresario coñece aos seus traballadores e é máis accesible, o que axuda a reforzar o sentimento de pertenza.
• Especialización. Atenden mellor as necesidades de determinados segmentos ou nichos de mercado que non resultan interesantes para as grandes empresas.
• Menor burocracia interna. Posúen estruturas máis simples que facilitan a comunicación e permiten tomar decisións con maior rapidez.

Inconvenientes das Pemes

• Capacidade financeira limitada. As súas fontes de financiamento son escasas e caras.
• Custos de produción elevados. Non poden aproveitarse das economías da escala, o que lles impide ofrecer prezos competitivos máis baixos.
• Escasa capacidade negociadora fronte a provedores e clientes. As pemes teñen moitas veces que someterse ás súas condicións de pago, prazos, descontos, etc.
• Menor penetración das tecnoloxías. O uso de Internet nas pemes é, en moitos casos, aínda unha materia pendente.
• Menor capacidade de distribución e de recursos para I+D e márketing.
• Xestión paternalista. Adoita existir unha gran dependencia dun líder carismático ou visionario que a puxo en pé.

Estratexias de Expansión

Pódese realizar de tres formas:

• Penetración no mercado. O seu obxectivo é incrementar as vendas dos produtos actuais da empresa no seu mercado actual.
• Desenvolvemento do mercado. O seu obxectivo é tratar de vender os produtos actuais da empresa en novos mercados.
• Desenvolvemento de produtos. Consiste en introducir novos produtos nos mercados actuais.

Estratexias de Diversificación

Podemos destacar os seguintes tipos:

• Diversificación horizontal. Tipo de diversificación relacionada na que a empresa incorpora produtos substitutivos ou complementarios dos existentes.
• Diversificación ou integración vertical. Tipo de diversificación relacionada na que a empresa incorpora un proceso que antes realizaba un provedor.
• Diversificación heteroxénea.