Conceptos Clave da Historia de España no Século XIX

Abdicacións de Baiona

Renuncias sucesivas, acontecidas na cidade francesa de Baiona en 1808, de Carlos IV e o seu fillo Fernando VII ao trono de España en favor de Napoleón Bonaparte, quen pouco despois cedeu eses dereitos ao seu irmán, que reinou co nome de Xosé I Bonaparte.

Afrancesados

Reducido grupo de españois que apoiou a Xosé I Bonaparte nas tarefas de goberno. Consideraban que o reformismo autoritario francés era o único medio para lograr a renovación e o cambio en España. Ao finalizar a Guerra de Independencia foron perseguidos e moitos exiliáronse a Francia.

Cantonalismo

Modelo de organización territorial que defende a creación dun estado composto por unidades políticas territoriais soberanas —os cantóns— que mediante acordos libres se unen formando a federación española. En 1873 os seus partidarios protagonizaron insurreccións cantonalistas, destacando a de Cartaxena, que foron sufocados polo exército.

Manifesto dos Persas

Documento que presentaron en 1814 deputados absolutistas a Fernando VII tras o seu retorno, solicitándolle a abolición dos decretos promulgados polas Cortes de Cádiz e a Constitución de 1812, así como a restauración do Antigo Réxime. O monarca atendeu as peticións restablecendo o absolutismo.

Manifesto de Sandhurst

Documento elaborado por Cánovas del Castillo e asinado en decembro de 1874 por Alfonso de Borbón na academia militar inglesa onde estudaba. Neste manifesto indicaba a necesidade de restaurar a monarquía borbónica en España, presentándose coma un rei respectuoso co sistema liberal constitucional e defensor da orde social e a relixión católica.

Unión Liberal

Partido político fundado en 1858 polo xeneral O'Donnell que agrupaba á esquerda moderada, á dereita progresista e numerosos militares. Partidarios da monarquía constitucional de Isabel II, gobernaron de 1858-1863 e de 1865-1866, destacando as campañas de prestixio militar que desenvolveron no exterior.

Tratado de Valençay

Acordo de paz asinado en 1813 polo que Napoleón aceptaba a suspensión das hostilidades, o retorno de Fernando VII ao trono de España, a devolución dos territorios ocupados e a renuncia de Xosé I. Tanto tropas francesas e británicas debían abandonar España finalizando a Guerra de Independencia.

Pragmática Sanción de 1830

Disposición promulgada por Fernando VII que anulaba a Lei Sálica aprobada por Felipe V que impedía o acceso ao trono ás mulleres. Esta medida supuxo a exclusión do infante Carlos de Borbón do trono español e converteu a Isabel II en herdeira.

Pronunciamento

Levantamento de parte do exército, contando co apoio dun determinado sector da sociedade que se pronuncia a favor do cambio do sistema político vixente. Foron frecuentes os que defendían o liberalismo fronte ao absolutismo de Fernando VII e os que defendían o liberalismo progresista fronte ao conservador no reinado de Isabel II.