Filosofía Política de Platón: Mito, Alma e Polis

Mito do Carro Alado

• Intelectualismo: O mito do carro alado pon de manifesto que o principal interese de Platón é o interese ético (o elemento racional ten dereito a gobernar aos outros elementos, a actuar como un auriga).
• Dimensión ética-política: Só a hexemonía da razón pode garantir a xustiza tanto no individuo como na sociedade (xustiza = harmonía).
• Cando a alma racional exerce correctamente a súa función e, como o auriga, guía e controla ás outras dúas partes (os dous cabalos), prodúcese a harmonía no individuo (reflexo da harmonía social).

Concepción Política de Platón: Política e Antropoloxía

A teoría política platónica desenvólvese en íntima conexión coa súa antropoloxía e coa súa ética. Platón sostén que o individuo pertence á cidade e non é nada fóra dela e, por outra banda, a cidade non é senón o conxunto dos individuos que a constitúen.

Definición de Polis

• Polis: Unha comunidade estable de seres humanos que coopera entre si para atender as súas necesidades e incrementar o seu benestar común.
• Platón distingue entre polis básica e polis civilizada.

Polis Básica

• A polis básica é unha comunidade que traballa para satisfacer as necesidades económicas básicas das persoas.
• As funcións están diferenciadas e especializadas de tal xeito que as necesidades dos seus membros estean cubertas.
• Debería ser moi pequena.
• A vida social desta polis básica sería necesariamente sinxela.

Características Adicionais da Polis Básica

• A polis básica defínese exclusivamente en termos económicos e non políticos.
• Ao ser unha comunidade que se basea no libre intercambio de bens, habilidades e servizos con vistas a prever as necesidades humanas básicas, non necesitará ningún sistema de goberno.

Interese de Platón na Polis Básica

Platón non ten un interese particular na política da polis básica; utilízaa tan só como modelo que revela a estrutura económica máis fundamental que se precisa nunha comunidade humana estable.

Polis Civilizada

A súa estrutura económica desenvolveuse moito máis ca da polis básica; é máis complexa. A complexidade destas novas relacións non se baseará no intercambio de produtos senón na busca do máximo beneficio, na acumulación da riqueza.