Economía: Funcionamento e Factores Clave

Funcionamento Global da Economía

Os obxectivos macroeconómicos pódense resumir nun: conseguir un nivel de crecemento da economía que permita satisfacer cada vez máis necesidades, garantindo o pleno emprego dos recursos e mantendo os prezos estables.

A realidade económica dun país depende dunha serie de factores que condicionan o seu progreso económico. Os factores serían tres:

• Forzas internas de mercado, que se expresan no xogo da oferta e da demanda.
• Perturbacións externas, que teñen que ver coa situación política dos países, conflitos bélicos, desastres naturais, etc.
• Actuación dos gobernos, que dirixen e controlan a economía a través das súas políticas.

Forzas Internas de Mercado

Supoñendo que non houbese perturbacións externas nin intervencións do Estado, os resultados económicos dependerían das forzas internas do mercado, única e exclusivamente. Un dos debates da actualidade é determinar en que medida as forzas do mercado garanten resultados estables de crecemento, emprego e prezos ou se precisa a intervención do Estado para conseguilos.

Consumo e Aforro

En macroeconomía, o consumo é o gasto total realizado polas familias en bens e servizos nun período dado. Inclúe bens duradeiros e bens non duradeiros, pero non inclúe a compra de vivenda, que se considera gasto de investimento.

O consumo depende de diferentes factores:

• Renda dispoñible das familias: o consumo medra a medida que aumenta a renda. Tan importante como a renda actual é a renda permanente, é dicir, a que se ten por termo medio ao longo da vida.
• Tipos de xuro e facilidades para obter créditos: se baixan os tipos de xuro, resultará máis barato pedir prestado, o que favorece o consumo.
• Ciclo vital: as persoas novas e anciás son máis propensas a gastar a súa renda. As persoas de idades intermedias teñen maior preocupación por aforrar.

O aforro

Despois de efectuados os gastos de consumo, a renda que lle queda ás familias é o seu aforro. As razóns para levar a cabo o aforro son:

• Asegurar a protección ante posibles situacións adversas (paro, enfermidade, etc.).
• Poder levar a cabo proxectos que requiren desembolsos importantes (comprar vivenda, montar un negocio, etc.).
• Obter unha renda suplementaria, sobre todo, para a xubilación.

O aforro, igual ca o consumo, aumenta na medida que medra a renda. A maior tipo de xuro, maior estímulo ao aforro.

Propensión Marxinal a Consumir ou Aforrar

A cantidade en que se incrementa o consumo cando aumenta a renda dispoñible nun euro denomínase propensión marxinal a consumir. O que non se gasta, afórrase. O aumento do nivel de aforro derivado dun euro adicional de renda denomínase propensión marxinal a aforrar.

Importancia do Consumo na Evolución da Economía

Case dúas terceiras partes do PIB destínanse ao consumo. Un aumento dun euro no gasto en consumo xera un incremento do PIB en máis de 0,6 euros. Por iso, a súa evolución é unha preocupación continua dos gobernos, xa que a súa variación pode producir desequilibrios na economía.

Para analizar a avaliación do consumo, contamos cunha serie de indicadores:

• A enquisa continua de orzamentos familiares: recolle as expectativas de gasto das familias, así como o grao de optimismo ou pesimismo sobre o futuro.
• Matriculacións de automóbiles: é un indicador moi fiable sobre a evolución do consumo nun país.
• Vendas en grandes superficies: a evolución das vendas en hipermercados e grandes establecementos proporciónannos datos para medir o consumo.
• Outros indicadores: consumo de gasolina, enquisa de comercio polo miúdo, importación e exportación dos bens de consumo.